ന്യൂഡല്‍ഹി: അതിരൂക്ഷമായ വായുമലിനീകരണം പരിഹരിക്കാന്‍ നടപടിയുണ്ടാകാത്തതില്‍ ഡല്‍ഹിയില്‍ വന്‍പ്രതിഷേധം. ഇന്ത്യാഗേറ്റ്‌ പരിസരത്ത്‌ പ്രതിഷേധിച്ചവരെ ഡല്‍ഹി പോലീസ്‌ കസ്‌റ്റഡിയിലെടുത്ത്‌ അജ്‌ഞാത കേന്ദ്രത്തിലേക്കു മാറ്റി. സമൂഹികമാധ്യമ കൂട്ടായ്‌മകളുടെ നേതൃത്വത്തിലാണു പ്രതിഷേധം. പതിവ്‌ സമരങ്ങളില്‍നിന്നു വ്യത്യസ്‌തമായി യുവതലമുറ(ജെന്‍ സി) സമരത്തിന്റെ മുന്‍നിരയില്‍ അണിനിരന്നു. ജെ.എന്‍.യു, ഡല്‍ഹി യൂണിവേഴ്‌സിറ്റി വിദ്യാര്‍ഥി നേതാക്കളും സാധാരണക്കാരും പ്രതിഷേധത്തില്‍ പങ്കെടുത്തു. കുട്ടികളുമായി എത്തിയ അമ്മമാരും പ്രതിഷേധത്തിന്റെ ഭാഗമായി. ശുദ്ധവായു ഉറപ്പാക്കാന്‍ അടിയന്തര സര്‍ക്കാര്‍ നടപടി ആവശ്യപ്പെട്ടാണ്‌ അവര്‍ ഒത്തുകൂടിയത്‌.
സാമൂഹിക മാധ്യമ സന്ദേശങ്ങളിലൂടെ ആശയവിനിമയം നടത്തിയശേഷം ഇന്നലെ വൈകിട്ടാണു പ്രതിഷേധക്കാര്‍ ഇന്ത്യാഗേറ്റിനു സമീപം ഒത്തുചേര്‍ന്നത്‌. ‘ഇന്ത്യ ഗേറ്റില്‍ പ്രതിഷേധം നടത്താന്‍ അനുമതിയുണ്ടായിരുന്നില്ല. ക്രമസമാധാന നില നിലനിര്‍ത്താനും സുരക്ഷാ ക്രമീകരണങ്ങളില്‍ തടസമുണ്ടാകാതിരിക്കാനും വേണ്ടിയാണ്‌ സമരക്കാരെ കസ്‌റ്റഡിയിലെടുത്തത്‌’- എന്നായിരുന്നു പോലീസിന്റെ വിശദീകരണം. ജെ.എന്‍.യു.എസ്.യു. പ്രസിഡന്റ്‌, ജോയിന്റ്‌ സെക്രട്ടറി, എ.ഐ.എസ്.എ. ഡി.യു. പ്രസിഡന്റ്‌, സെക്രട്ടറി എന്നിവരുള്‍പ്പെടെ നിരവധി പെണ്‍കുട്ടികളെയും പോലീസ്‌ കസ്‌റ്റഡിയിലെടുത്തു.
പ്രതിഷേധം പരിഗണിച്ച്‌ ഇന്ത്യാഗേറ്റ്‌ പരിസരത്ത്‌ പോലീസ്‌ വന്‍സുരക്ഷാ സന്നാഹം ഏര്‍പ്പെടുത്തിയിരുന്നു. സുപ്രീം കോടതി നിര്‍ദേശത്തിന്റെ അടിസ്‌ഥാനത്തില്‍ പ്രതിഷേധത്തിന്‌ അനുവാദമുള്ള ജന്ദര്‍മന്ദറിലേക്ക്‌ പ്രതിഷേധക്കാര്‍ മാറണമെന്നാണ്‌ പോലീസ്‌ നിലപാട്‌. പ്രതിഷേധത്തിന്‌ പിന്തുണയുമായി പ്രതിപക്ഷ കക്ഷികളായ ആം ആദ്‌മി പാര്‍ട്ടിയും കോണ്‍ഗ്രസും രംഗത്തെത്തി.
ഡല്‍ഹിയില്‍ വായുവിന്റെ ഗുണനിലവാരം ‘വളരെ മോശം’ വിഭാഗത്തില്‍ തുടരുകയാണ്‌. കേന്ദ്ര മലിനീകരണ നിയന്ത്രണ ബോര്‍ഡിന്റെ അറിയിപ്പനുസരിച്ച്‌ മൊത്തത്തിലുള്ള വായു ഗുണനിലവാര സൂചിക 391 ആണ്‌. എല്ലാ വര്‍ഷവും ഇത്തരത്തില്‍ വായുമലിനീകരണം ഉണ്ടാകാറുണ്ട്‌. അപ്പോഴെല്ലാം ആരെയെങ്കിലും പഴിചാരി രക്ഷപ്പെടാനാണു സര്‍ക്കാര്‍ ശ്രമിക്കാറുള്ളത്‌. മലിനമായ വായു ശ്വസിച്ചുകൊണ്ട്‌ നിരവധിയാളുകള്‍ മരിച്ചുകൊണ്ടിരിക്കുന്ന സാഹചര്യത്തില്‍ ഇതിനൊരു പരിഹാരം കാണണമെന്നാണ്‌ പ്രതിഷേധക്കാരുടെ ആവശ്യം.
“സ്വകാര്യ നിരീക്ഷകര്‍ കാണിക്കുന്നത്‌ വായു ഗുണനിലവാര സൂചിക പല സ്‌ഥലങ്ങളിലും 999 കടന്നിരിക്കുന്നു എന്നാണ്‌. കൃത്യമായ നടപടി സ്വീകരിക്കുന്നതിനുപകരം, അധികാരികള്‍ സമാധാനപരമായ പ്രതിഷേധം തടയുകയാണ്‌. ആളുകള്‍ എന്താണ്‌ ആവശ്യപ്പെടുന്നത്‌? അവരുടെ ശ്വസിക്കാനുള്ള അവകാശം. കഴിഞ്ഞ 15 ദിവസമായി, ഞങ്ങള്‍ ഒന്നും കേട്ടിട്ടില്ല – ലോക്ക്‌ഡൗണില്ല, ഷട്ട്‌ഡൗണില്ല.ക്ല ൗഡ്‌ സീഡിങ്ങിനെക്കുറിച്ചോ മറ്റ്‌ ശ്രദ്ധ തിരിക്കുന്നതിനെക്കുറിച്ചോ ഉള്ള കഥകള്‍ മാത്രമേയുള്ളൂ. ഇത്‌ വളരെ നിര്‍ഭാഗ്യകരമായ സാഹചര്യമാണ്‌’ – പ്രതിഷേധക്കാര്‍ വ്യക്‌തമാക്കി.
ശുദ്ധവായുവിനായി ‘ജെന്‍ സി’ പ്രതിഷേധം: ഡല്‍ഹിയില്‍ വിദ്യാര്‍ഥികള്‍ക്കൊപ്പം മാതാപിതാക്കളും തെരുവില്‍
RELATED ARTICLES
